Eitt sem mér þykir alveg nauðsynlegt, það er að reyna að búa sem flest til sjálf. Þ.e. sérstaklega matinn minn. Síðan ég flutti hingað út til Danmerkur höfum við hjónin verið dugleg við að prufa okkur áfram með allra handa uppskriftir og aðferðir, búið til okkar eigin Chorizo pylsur (sem heppnuðust ekki alveg 100%) allar sósur, brauð (í 70% tilvika er heimabakað) og já bara nefna það. Haustið er líka akkúrat tíminn til að búa sér í haginn fyrir vetur komandi, sulta og svoleiðis og um að gera að nýta sér það að ávextir og grænmeti er oft á tíðum á góðu verði á þessum árstíma því gnótt er af uppskerunni eftir sumarið.

• 1,5 kg af blönduðum flysjuðum og kjarnahreinsuðum eplum, skornum í bita
• 350 gr. af fljótandi hunangi (hér notað Acacie)
• 200 gr. sykur (mæli með hrásykri, gefur skemmtilegra bragð)
• 1 tsk. kanill
• 1/2 tsk negull
• 2,5 dl epladjús (ég sleppti því eplin voru mjög safamikil)

Aðferðin er svona sáraeinföld:

Allt innihald er sett í pott, suðan látin koma upp og hrært í. suðan lækkuð og látið malla í smá stund eða þar til eplin hafa meirnað og hægt er að pressa þau. Þá er makuð/smjörið látið malla í um hálftíma eða þangað til það hefur þykknað.
Sett í hreinar krukkur og geymt í ísskáp þangað til uppurið. helst í kæli í 7 til 10 daga, en ef þetta er eins hjá ykkur og hér á mínu heimili þá er Eplasmjörið löngu búið fyrir þann tíma. Himneskt á ristað brauð, á nýbakað bollur eða á pönnukökurnar. Það skemmir svo ekki að setja þetta í sæta krukku með þessum merkimiða sem ég bjó til og sem þú getur vistað og prentað út.
Það er svo miklu skemmtilegra að búa til eitthvað sjálfur og fara með það alla leið. Ekki gleyma umbúðunum, þær skipta máli. Lær hér fljóta með eplasmjörið mitt, eða alla vega eina mynd af einni krukku, komin með miðann, smá efnisbút á lokið og hampgarn utanum um. Miklu fallegra í ísskápnum svona og tala nú ekki um á borðið.